ਰੂਪਨਗਰ ( ਅਵਤਾਰ ਸਿੰਘ ਕੰਬੋਜ਼ )
ਪੰਜਾਬ ਕਲਾ ਪ੍ਰੀਸ਼ਦ ਚੰਡੀਗੜ੍ਹ ਵੱਲੋਂ ਪੰਜਾਬ ਦੀ ਨਵ-ਸਿਰਜਣਾ ਤਹਿਤ ਆਰੰਭ ਕੀਤੀ ਗਈ ਪ੍ਰੋਗਰਾਮ ਲੜੀ ‘ਸਿਰਜਣਾ ਅਤੇ ਸੰਵਾਦ’ ਅਧੀਨ ‘ਬੀਬੀ ਕਿਰਪਾਲ ਕੌਰ ਯਾਦਗਾਰੀ ਸਾਹਿਤਿਕ ਟਰੱਸਟ’ ਰੂਪਨਗਰ ਦੇ ਸਹਿਯੋਗ ਨਾਲ ਸਥਾਨਕ ਕਲਗੀਧਰ ਕੰਨਿਆ ਪਾਠਸ਼ਾਲਾ ਵਿਖੇ ਪੰਜਾਬੀ ਦੀ ਪ੍ਰਸਿੱਧ ਨਾਵਲਕਾਰਾ ਹਰਜੀਤ ਕੌਰ ਵਿਰਕ ਨਾਲ, ਨਾਵਲਾਂ ਦੀ ਸਿਧਾਂਤਕਾਰੀ ਇਤਿਹਾਸ ਅਤੇ ਉਹਨਾਂ ਦੇ ਨਾਵਲਾਂ ਨਾਲ ਜੁੜੇ ਵੱਖ-ਵੱਖ ਪਹਿਲੂਆਂ ਬਾਰੇ ਗੰਭੀਰ ਵਿਚਾਰ ਚਰਚਾ ਕੀਤੀ ਗਈ।
ਸਮਰੋਹ ਦੇ ਆਰੰਭ ਵਿੱਚ ਕੋਆਰਡੀਨੇਟਰ ਡਾ. ਜੇ.ਬੀ ਸੇਖੋਂ ਨੇ ਪੰਜਾਬ ਕਲਾ ਪਰਿਸ਼ਦ ਦੇ ਚੇਅਰਮੈਨ ਸਵਰਨਜੀਤ ਸਵੀ ਦੀ ਅਗਵਾਈ ਹੇਠ ਚੱਲ ਰਹੀ ਇਸ ਹਫ਼ਤਾਵਾਰੀ ਗੋਸ਼ਟੀ ਬਾਰੇ ਦੱਸਦਿਆਂ ਕਿਹਾ ਕਿ ਪੰਜਾਬੀ ਗਲਪ ਦੇ ਖੇਤਰ ਵਿੱਚ ਇਸ ਸੰਵਾਦ ਲੜੀ ਨਾਲ ਵਿਚਾਰ ਚਰਚਾ ਦੀਆਂ ਮੌਲਿਕ ਸੰਭਾਵਨਾਵਾਂ ਪੈਦਾ ਹੋ ਰਹੀਆਂ ਹਨ। ਨਾਵਲਕਾਰ ਹਰਜੀਤ ਕੌਰ ਵਿਰਕ ਨੇ ਆਪਣੇ ਪੰਜ ਨਾਵਲਾ ਬਾਰੇ ਵਿਚਾਰ ਸਾਂਝੇ ਕੀਤੇ। ਉਹਨਾਂ ਆਪਣੇ ਨਾਵਲਾਂ ਦੀ ਵਿਸ਼ਾ- ਵਸਤੂ ਦੀ ਚੋਣ,ਪਾਤਰ, ਭਾਸ਼ਾ ਅਤੇ ਰਚਨਾ ਪ੍ਰਕਿਰਿਆ ਬਾਰੇ ਗੱਲਬਾਤ ਕੀਤੀ। ਉਹਨਾਂ ਕਿਹਾ ਕਿ ਉਹਨਾਂ ਦੇ ਨਾਵਲਾਂ ਵਿੱਚ ਘਟਨਾਵਾਂ, ਪਾਤਰ,ਮਾਹੌਲ ਦੀ ਯਥਾਰਥਕਤਾ ਦੀ ਪੇਸ਼ਕਾਰੀ ਦਾ ਅਮਲ ਸਹਿਜ ਸੁਭਾਅ ਚੱਲਦਾ ਰਹਿੰਦਾ ਹੈ।
ਇਸ ਮੌਕੇਂ ਕਹਾਣੀਕਾਰਾ ਯਤਿੰਦਰ ਕੌਰ ਮਾਹਲ ਤੇ ਡਾ. ਪੁਸ਼ਵਿੰਦਰ ਕੌਰ ਨੇ ਪੰਜਾਬੀ ਨਾਵਲ ਪਰੰਪਰਾ ਵਿੱਚ ਨਾਰੀ ਪਾਤਰ ਅਤੇ ਹਰਜੀਤ ਕੌਰ ਵਿਰਕ ਦੇ ਨਾਵਲਾਂ ਵਿਚਲੇ ਨਾਰੀਪਾਤਰਾਂ ਬਾਰੇ ਤੁਲਨਾਤਮਕ ਸਵਾਲ ਪੁੱਛੇ । ਨਾਵਲਕਾਰ ਜਸਵੀਰ ਮੰਡ ਨੇ ਨਾਵਲ ਵਿੱਚ ਘਟਨਾ ਦੀ ਥਾਂ ਘਟਨਾ ਦੀ ਮਾਨਸਿਕਤਾ ਸਬੰਧੀ ਸਵਾਲ ਕੀਤੇ। ਸੰਵਾਦ ਰਚਨਾ ਮੌਕੇ ਡਾ. ਰਜਿੰਦਰ ਸਿੰਘ ਕੁਰਾਲੀ, ਕਹਾਣੀਕਾਰ ਸਰੂਪ ਸਿਆਲਵੀ,ਡਾ. ਜਤਿੰਦਰ ਕੁਮਾਰ, ਨਾਵਲਕਾਰਾ ਮਨਦੀਪ ਰਿੰਪੀ, ਭੁਪਿੰਦਰ ਸਿੰਘ ਭਾਗੋ ਮਾਜਰਾ ਨੇ ਮਹਿਮਾਨ ਨਾਵਲਕਾਰਾ ਹਰਜੀਤ ਕੌਰ ਵਿਰਕ ਨਾਲ ਨਾਵਲ ਯਥਾਰਥ,ਬਿਰਤਾਂਤ ਦੀ ਭਾਸ਼ਾ, ਨਾਵਲ ਦੇ ਪ੍ਰੇਰਨਾ ਸਰੋਤ ਕਥਾ ਅਤੇ ਕਲਾਤਮਿਕ ਅੰਸ਼ ਬਾਰੇ ਵਿਚਾਰ ਸਾਂਝੇ ਕੀਤੇ। ਨਾਵਲਕਾਰਾ ਨੇ ਬੜੇ ਸਹਿਜ ਰੂਪ ਵਿੱਚ ਜਵਾਬ ਦਿੱਤੇ।
ਕਹਾਣੀਕਾਰ ਯਤਿੰਦਰ ਕੌਰ ਮਾਹਲ ਨੇ ਇਸ ਸੰਵਾਦ ਸਮਾਰੋਹ ਬਾਰੇ ਪ੍ਰਭਾਵੀ ਸ਼ਬਦ ਸਾਂਝੇ ਕਰਦਿਆਂ ਸਭ ਦਾ ਧੰਨਵਾਦ ਕੀਤਾ। ਡਾਕਟਰ ਜੇ.ਵੀ ਸੇਖੋਂ ਹੋਰਾਂ ਨੇ ਸਮੁੱਚੇ ਸਮਾਰੋਹ ਵਿੱਚ ਰੱਖੇ ਨੁਕਤਿਆਂ ‘ਤੇ ਵਿਚਾਰ ਰੱਖੇ।
ਇਸ ਮੌਕੇ ਗੁਰਿੰਦਰ ਸਿੰਘ ਕਲਸੀ, ਅਮਰਜੀਤ ਕੌਰ ਮੋਰਿੰਡਾ, ਡਾ. ਗੁਰਪਾਲ ਸਿੰਘ, ਜਸਵੰਤ ਸਿੰਘ ਸੈਣੀ, ਐਡਵੋਕੇਟ ਮਹਿੰਦਰ ਸਿੰਘ ਭਲਿਆਣ, ਪਵਨ ਕੁਮਾਰ ਰੱਤੋਂ, ਪ੍ਰੋ. ਮਨਦੀਪ ਕੁਮਾਰ, ਪ੍ਰੋ. ਦੀਪਕ, ਹਰਦੀਪ ਸਿੰਘ ਗਿੱਲ, ਪਰਵਿੰਦਰ ਸਿੰਘ ਅਤੇ ਕੁਲਵਿੰਦਰ ਖੈਰਾਵਾਦ ਹਾਜ਼ਰ ਰਹੇ।
