ਰੂਪਨਗਰ ( ਅਵਤਾਰ ਸਿੰਘ ਕੰਬੋਜ਼ )
ਬੀਬੀ ਕਿਰਪਾਲ ਕੌਰ ਯਾਦਗਾਰੀ ਸਾਹਿਤਕ ਟਰੱਸਟ ਰੂਪਨਗਰ ਦੀ ਮਾਸਿਕ ਇਕੱਤਰਤਾ ਯਤਿੰਦਰ ਕੌਰ ਮਾਹਲ ਦੀ ਪ੍ਰਧਾਨਗੀ ਹੇਠ ਕਲਗੀਧਰ ਕੰਨਿਆ ਪਾਠਸ਼ਾਲਾ ਰੋਪੜ ਵਿਖੇ ਕੀਤੀ ਗਈ। ਇਸ ਦੌਰਾਨ ਲੇਖਕਾਂ ਵੱਲੋਂ ਉੱਘੀ ਕਹਾਣੀਕਾਰਾ ਤੇ ਨਾਵਲਕਾਰਾ ਚੰਦਨ ਨੇਗੀ ਦੇ ਸਦੀਵੀ ਚਲਾਣੇ ‘ਤੇ ਸ਼ਰਧਾਂਜਲੀ ਭੇਟ ਕੀਤੀ ਗਈ।
ਇਸ ਮੌਕੇ ਰਚਨਾਵਾਂ ਦੇ ਦੌਰ ਵਿੱਚ ਗਿਆਨੀ ਈਸ਼ਰ ਸਿੰਘ ਥਲੀ ਅਤੇ ਨਿਰਮਲ ਸਿੰਘ ਅਧਰੇੜਾ ਵੱਲੋਂ ਗੁਰੂ ਨਾਨਕ ਫ਼ਿਲਾਸਫ਼ੀ ‘ਤੇ ਪਹਿਰਾ ਦਿੰਦੀਆਂ ਕਵਿਤਾਵਾਂ, ਕੁਲਵਿੰਦਰ ਖੈਰਾਬਾਦ ਵੱਲੋਂ ਗੁਰੂ ਸਾਹਿਬਾਨ ਦੀ ਮਾਨਵਵਾਦੀ ਸੋਚ ਨੂੰ ਦਰਸਾਉਂਦਾ ਖੂਬਸੂਰਤ ਗੀਤ, ਸੁੱਚਾ ਸਿੰਘ ਅਧਰੇੜਾ ਨੇ ਵਾਰਿਸ ਸ਼ਾਹ ਅਤੇ ਹੀਰ ਸਲੇਟੀ ਵਿਚਲੇ ਵਾਰਤਾਲਾਪ ਦਾ ਕਾਵਿਕ ਰੂਪ ‘ ਤੂੰ ਅਮਰ ਹੋ ਗਿਆ ਵੇ ਵਾਰਸਾ, ਮਿੱਟੀ ਕੁੱਟ ਕੇ ਮੇਰੀ ‘ ਪੇਸ਼ ਕਰ ਵਾਹਵਾ ਖੱਟੀ।
ਬਾਲ ਸਾਹਿਤ ਰਚੇਤਾ ਸੁਰਿੰਦਰ ਰਸੂਲਪੁਰੀ ਨੇ ਬੱਚਿਆਂ ਲਈ ਸਿੱਖਿਆਦਾਇਕ ਕਹਾਣੀ ਨੂੰ ਕਵਿਤਾ ਰਾਹੀਂ ਖੂਬਸੂਰਤ ਢੰਗ ਨਾਲ ਪੇਸ਼ ਕੀਤਾ ਤੇ ਸ੍ਰੀ ਗੁਰੂ ਤੇਗ ਬਹਾਦਰ ਜੀ ਦੀ ਸ਼ਹਾਦਤ ਨੂੰ ਸਮਰਪਿਤ ਰਚਨਾ ਸੁਣਾਈ। ਲਾਲੀ ਕਰਤਾਰਪੁਰੀ ਵੱਲੋਂ ਵੀ ਗੁਰੂ ਸਾਹਿਬ ਦੀ ਸ਼ਹਾਦਤ ਨੂੰ ਸਮਰਪਿਤ ਕਾਵਿਕ ਰੰਗ ਬਿਖੇਰਿਆ ਗਿਆ। ਗੀਤਕਾਰ ਹਰਦੀਪ ਸਿੰਘ ਗਿੱਲ ਵੱਲੋਂ ਗੀਤ ਦੀ ਸਾਂਝ ਪਾਈ ਗਈ।
ਯਤਿੰਦਰ ਕੌਰ ਮਾਹਲ ਵੱਲੋਂ ਇਰਾਨੀ ਲੇਖਿਕਾ ਫਰਨੂਸ਼ ਮੋਸੀਰੀ ਦੇ ਚਰਚਿਤ ਨਾਵਲ The Bath house ਦੇ ਅੰਸ਼ ਗੁਰਮੁਖੀ ਵਿਚ ਅਨੁਵਾਦ ਕਰ ਪੇਸ਼ ਕੀਤੇ ਗਏ। ਇਕੱਤਰਤਾ ‘ਚ ਪੜ੍ਹੀਆਂ ਗਈਆਂ ਰਚਨਾਵਾਂ ‘ਤੇ ਉਸਾਰੂ ਚਰਚਾ ਕੀਤੀ ਗਈ।
ਇਸ ਮੌਕੇ ਡਾ. ਗੁਰਪਾਲ ਸਿੰਘ ਵੀ ਹਾਜ਼ਰ ਰਹੇ। ਯਤਿੰਦਰ ਮਾਹਲ ਵੱਲੋਂ ਹਾਜ਼ਰ ਸਾਹਿਤਕਾਰਾਂ ਦਾ ਧੰਨਵਾਦ ਕੀਤਾ ਗਿਆ। ਇਕੱਤਰਤਾ ਦਾ ਸੰਚਾਲਨ ਹਰਦੀਪ ਸਿੰਘ ਗਿੱਲ ਵੱਲੋਂ ਚਲਾਇਆ ਗਿਆ।
