ਭਾਜਪਾ ਕੌਮੀ ਸੰਸਦੀ ਬੋਰਡ ਦੇ ਮੈਂਬਰ ਇਕਬਾਲ ਸਿੰਘ ਲਾਲਪੁਰਾ ਤੇ ਡਾਕਟਰ ਕੁਲਵੰਤ ਸਿੰਘ ਧਾਲੀਵਾਲ ਨੇ ਸਮੂਹਿਕ ਤੌਰ ‘ਤੇ ਕੀਤਾ ਕੈਂਪ ਦਾ ਉਦਘਾਟਨ
ਘਨੌਲਾ /ਰੂਪਨਗਰ, 7 ਅਕਤੂਬਰ ( ਅਵਤਾਰ ਸਿੰਘ ਕੰਬੋਜ਼ )
ਪ੍ਰਧਾਨ ਮੰਤਰੀ ਸ਼੍ਰੀ ਨਰਿੰਦਰ ਮੋਦੀ ਦੇ ਜਨਮ ਦਿਨ ਨੂੰ ਸਮਰਪਿਤ “ਸੇਵਾ ਪੰਦਰਵਾੜੇ” ਦੇ ਤਹਿਤ ਅੱਜ ਭਾਜਪਾ ਜ਼ਿਲ੍ਹਾ ਪ੍ਰਧਾਨ ਅਜੈਵੀਰ ਸਿੰਘ ਲਾਲਪੁਰਾ ਦੀ ਅਗਵਾਈ ਹੇਠ ਇਨਸਾਨੀਅਤ ਪਹਿਲਾਂ ਵੱਲੋਂ ਪਿੰਡ ਘਨੌਲਾ ਵਿੱਚ ਮੈਗਾ ਕੈਂਸਰ ਕੇਅਰ, ਅੱਖਾਂ ਅਤੇ ਸਿਹਤ ਜਾਂਚ ਕੈਂਪ ਲਗਾਇਆ ਗਿਆ। ਕੈਂਪ ਦਾ ਉਦਘਾਟਨ ਭਾਜਪਾ ਕੌਮੀ ਸੰਸਦੀ ਬੋਰਡ ਦੇ ਮੈਂਬਰ ਇਕਬਾਲ ਸਿੰਘ ਲਾਲਪੁਰਾ ਤੇ ਡਾਕਟਰ ਕੁਲਵੰਤ ਸਿੰਘ ਧਾਲੀਵਾਲ ਨੇ ਸਮੂਹਿਕ ਤੌਰ ‘ਤੇ ਕੀਤਾ।
ਇਸ ਕੈਂਪ ਦਾ ਆਯੋਜਨ ਵਰਲਡ ਕੈਂਸਰ ਕੇਅਰ ਦੇ ਸਹਿਯੋਗ ਨਾਲ ਕੀਤਾ ਗਿਆ, ਜਿਸ ਵਿੱਚ 400 ਤੋਂ ਵੱਧ ਲੋਕਾਂ ਨੇ ਆਪਣੀ ਸਿਹਤ ਦੀ ਜਾਂਚ ਕਰਵਾਈ ਅਤੇ ਮੁਫ਼ਤ ਦਵਾਈਆਂ, ਚਸ਼ਮੇ ਅਤੇ ਸਿਹਤ ਸਲਾਹ ਪ੍ਰਾਪਤ ਕੀਤੀ।
ਕੈਂਪ ਵਿੱਚ ਵਿਸ਼ੇਸ਼ ਤੌਰ ‘ਤੇ ਕੈਂਸਰ ਦੀ ਰੋਕਥਾਮ ਅਤੇ ਸ਼ੁਰੂਆਤੀ ਜਾਂਚ ‘ਤੇ ਧਿਆਨ ਦਿੱਤਾ ਗਿਆ। ਕੁੱਲ 400 ਲੋਕਾਂ ਦੀ ਕੈਂਸਰ ਸਕ੍ਰੀਨਿੰਗ ਕੀਤੀ ਗਈ। ਕਈ ਲੋਕਾਂ ਨੂੰ ਕੈਂਸਰ ਦੇ ਸ਼ੁਰੂਆਤੀ ਲੱਛਣਾਂ, ਤਮਾਕੂ ਦੇ ਨੁਕਸਾਨ ਅਤੇ ਸਿਹਤਮੰਦ ਜੀਵਨ ਸ਼ੈਲੀ ਬਾਰੇ ਵਿਸਥਾਰ ਨਾਲ ਜਾਣਕਾਰੀ ਦਿੱਤੀ ਗਈ।
ਜਾਂਚ ਰਿਪੋਰਟ ਅਨੁਸਾਰ 9 ਔਰਤਾਂ ਦੀ ਮੈਮੋਗ੍ਰਾਫੀ, 7 ਦੀ ਬ੍ਰੈਸਟ ਆਈ-ਸਕੈਨ, 5 ਦੀ ਪੈਪ ਸਮੀਅਰ ਟੈਸਟ, 22 ਪੁਰਸ਼ਾਂ ਦੀ ਪੀਐਸਏ ਟੈਸਟ, 41 ਦੀ ਸੀਬੀਸੀ ਜਾਂਚ ਅਤੇ 36 ਮਰੀਜ਼ਾਂ ਦੀ ਮੂੰਹ ਦੀ ਜਾਂਚ ਕੀਤੀ ਗਈ।
ਅੱਖਾਂ ਦੇ ਵਿਭਾਗ ਵੱਲੋਂ 142 ਲੋਕਾਂ ਦੀ ਸਕ੍ਰੀਨਿੰਗ ਕੀਤੀ ਗਈ ਅਤੇ 127 ਲੋਕਾਂ ਨੂੰ ਨਵੇਂ ਚਸ਼ਮੇ ਮੁਹੱਈਆ ਕਰਵਾਏ ਗਏ। ਕਈ ਮਰੀਜ਼ਾਂ ਨੂੰ ਮੋਤੀਆਬਿੰਦ ਦੇ ਸ਼ੁਰੂਆਤੀ ਲੱਛਣਾਂ ਬਾਰੇ ਜਾਣਕਾਰੀ ਦਿੱਤੀ ਗਈ ਅਤੇ ਇਲਾਜ ਲਈ ਮਾਰਗਦਰਸ਼ਨ ਪ੍ਰਦਾਨ ਕੀਤਾ ਗਿਆ।
ਜਨਰਲ ਸਿਹਤ ਜਾਂਚ ਦੌਰਾਨ 183 ਲੋਕਾਂ ਦਾ ਬਲੱਡ ਪ੍ਰੈਸ਼ਰ ਅਤੇ ਸ਼ੂਗਰ ਲੈਵਲ ਟੈਸਟ ਕੀਤਾ ਗਿਆ। ਰਿਪੋਰਟ ਅਨੁਸਾਰ 18 ਵਿਅਕਤੀਆਂ ਵਿੱਚ ਹਾਈ ਸ਼ੂਗਰ ਅਤੇ 21 ਵਿੱਚ ਹਾਈ ਬੀਪੀ ਦੇ ਕੇਸ ਸਾਹਮਣੇ ਆਏ। ਸਭ ਮਰੀਜ਼ਾਂ ਨੂੰ ਡਾਕਟਰਾਂ ਨੇ ਸਮੇਂ ਸਿਰ ਇਲਾਜ ਤੇ ਜੀਵਨ ਸ਼ੈਲੀ ਸੁਧਾਰ ਲਈ ਸਲਾਹ ਦਿੱਤੀ।
ਇਸ ਮੌਕੇ ਇਕਬਾਲ ਸਿੰਘ ਲਾਲਪੁਰਾ ਨੇ ਖੁਦ ਕੈਂਪ ਦਾ ਨਿਰੀਖਣ ਕੀਤਾ ਅਤੇ ਡਾਕਟਰਾਂ, ਅਤੇ ਵਲੰਟੀਅਰਾਂ ਨਾਲ ਮੁਲਾਕਾਤ ਕੀਤੀ। ਉਨ੍ਹਾਂ ਕਿਹਾ ਕਿ “ਸੇਵਾ ਹੀ ਸੰਕਲਪ” ਸਿਰਫ਼ ਇੱਕ ਮੁਹਿੰਮ ਨਹੀਂ ਸਗੋਂ ਮਨੁੱਖਤਾ ਦੀ ਰੂਹ ਹੈ। ਉਨ੍ਹਾਂ ਕਿਹਾ ਕਿ ਭਾਰਤ ਦੇ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਦਾ ਜਨਮ ਦਿਨ “ਸੇਵਾ ਪੰਦਰਵਾੜੇ” ਰੂਪ ‘ਚ ਮਨਾਉਣਾ ਇਸ ਗੱਲ ਦਾ ਪ੍ਰਤੀਕ ਹੈ ਕਿ ਰਾਜਨੀਤੀ ਦੇ ਨਾਲ-ਨਾਲ ਸਮਾਜ ਸੇਵਾ ਵੀ ਸਾਡੀ ਨੈਤਿਕ ਜ਼ਿੰਮੇਵਾਰੀ ਹੈ।
ਲਾਲਪੁਰਾ ਨੇ ਕਿਹਾ ਕਿ ਇਨਸਾਨੀਅਤ ਪਹਿਲਾਂ ਦੀ ਟੀਮ ਅਗੇ ਵੀ ਸਿਹਤ ਜਾਗਰੂਕਤਾ ਅਤੇ ਮੁਫ਼ਤ ਜਾਂਚ ਕੈਂਪਾਂ ਰਾਹੀਂ ਲੋਕਾਂ ਤਕ ਸਿਹਤ ਸੇਵਾਵਾਂ ਪਹੁੰਚਾਉਂਦੀ ਰਹੇਗੀ। ਉਨ੍ਹਾਂ ਨੇ ਵਰਲਡ ਕੈਂਸਰ ਕੇਅਰ ਦੇ ਡਾਕਟਰਾਂ ਦਾ ਧੰਨਵਾਦ ਕੀਤਾ ਅਤੇ ਕਿਹਾ ਕਿ ਇਹ ਸਾਂਝੀ ਕੋਸ਼ਿਸ਼ ਹੀ ਸੱਚੇ ਭਾਰਤ ਦੀ ਤਸਵੀਰ ਹੈ।
ਕੈਂਪ ਦੇ ਅੰਤ ‘ਤੇ ਸਾਰੇ ਪਿੰਡ ਵਾਸੀਆਂ ਨੇ ਮਨੁੱਖਤਾ ਦੀ ਸੇਵਾ ਦਾ ਸੰਕਲਪ ਦੁਹਰਾਇਆ ਅਤੇ ਇਨਸਾਨੀਅਤ ਪਹਿਲਾਂ ਦੇ ਯਤਨਾਂ ਦੀ ਸ਼ਲਾਘਾ ਕੀਤੀ। ਪਿੰਡ ਦੇ ਬਜ਼ੁਰਗਾਂ ਅਤੇ ਜਵਾਨਾਂ ਨੇ ਇਸ ਗੱਲ ਦਾ ਐਲਾਨ ਕੀਤਾ ਕਿ ਉਹ ਭਵਿੱਖ ਵਿੱਚ ਵੀ ਅਜਿਹੀਆਂ ਸੇਵਾ ਮੁਹਿੰਮਾਂ ਦਾ ਹਿੱਸਾ ਬਣਨਗੇ।
ਇਸ ਮੌਕੇ ਪ੍ਰਿੰਸ ਕੌਸ਼ਿਕ, ਸਰਪੰਚ ਹਰਜੀਤ ਸਿੰਘ ਰਾਜ ਕੁਮਾਰ ਪੰਚ ਸੋਢੀ ਸਿੰਘ ਹਰਜੋਤ ਸਿੰਘ ਪ੍ਰਭਜੋਤ ਸਿੰਘ ਕਮਲਜੀਤ ਸਿੰਘ ਪੰਚ ਕੁਲਵੰਤ ਸਿੰਘ ਪੰਚ ਗੁਰਪ੍ਰੀਤ ਸੀ ਲਭਰਦਰ ਹਰਭਜਨ ਸਿੰਘ ਇੰਦਰਪਾਲ ਸਿੰਘ ਅਮਨਪ੍ਰੀਤ ਸਿੰਘ ਸਤਨਾਮ ਸਿੰਘ ਸੱਤੂ ਧਰਮਿੰਦਰ ਸਿੰਘ ਹਰਜੀਤ ਸਿੰਘ ਵਿਜੇ ਧੀਮਾਨ ਮਨਦੀਪ ਸਿੰਘ ਗੁਰਮੀਤ ਸਿੰਘ ਜਸਵੀਰ ਗੁਰਦੇਵ ਸਿੰਘ ਮੁਖਤਿਆਰ ਸਿੰਘ ਇੰਦਰਜੀਤ ਸਿੰਘ ਬੰਟੀ ਆਦਿ ਮੌਜੂਦ ਸਨ।
