ਆਉਣਾ ਜਾਣਾ ਹੋ ਗਿਆ ਔਖਾ
ਰੂਪਨਗਰ, 4 ਸਤੰਬਰ ( ਅਵਤਾਰ ਸਿੰਘ ਕੰਬੋਜ਼ )
ਗੋਬਿੰਦ ਵੈਲੀ ਮਾਜਰੀ ਰੋਡ ‘ਤੇ ਨਵੀਂ ਬਣਾਈ ਪੁਲੀ ‘ਤੇ ਚਿੱਕੜ ਹੋ ਜਾਣ ਕਾਰਨ ਵਾਹਨ ਫਸ ਰਹੇ ਹਨ ਅਤੇ ਇਲਾਕੇ ਦੇ ਲੋਕਾਂ ਦਾ ਆਉਣ ਜਾਣ ਔਖਾ ਹੋ ਰਿਹਾ ਹੈ । ਇਸ ਨਵੀਂ ਬਣਾਈ ਗਈ ਬਰਸਾਤੀ ਪੁਲੀ ‘ਤੇ ਅੱਜ ਫਿਰ ਇਕ ਵਾਹਨ ਚਿੱਕੜ ਵਿੱਚ ਫਸ ਗਿਆ ਜਿਸ ਨਾਲ ਮਾਜਰੀ ਰੋਡ ‘ਤੇ ਜਾਮ ਲੱਗ ਗਿਆ।
ਜਿਕਰਯੋਗ ਹੈ ਕਿ ਪਿਛਲੇ ਮਹੀਨੇ ਹੀ ਨਵੀਂ ਬਣਾਈ ਗਈ ਪੁਲੀ ਨੂੰ ਮਿੱਟੀ ਪਾ ਕੇ ਚਾਲੂ ਕਰ ਦਿੱਤਾ ਗਿਆ ਸੀ ਪਰ ਹੁਣ ਬਰਸਾਤ ਕਾਰਨ ਪੁਲੀ ਤੇ ਮਿੱਟੀ ਨੇ ਚਿੱਕੜ ਦਾ ਰੂਪ ਧਾਰਨ ਕਰ ਲਿਆ ਹੈ ਅਤੇ ਇਲਾਕੇ ਦੇ ਦਰਜਨਾਂ ਪਿੰਡਾਂ ਦੇ ਲੋਕਾਂ ਨੂੰ ਚਿੱਕੜ ਵਿੱਚ ਲੰਘਣਾ ਬਹੁਤ ਔਖਾ ਹੋ ਗਿਆ ਹੈ। ਪੁਲੀ ‘ਤੇ ਚਿੱਕੜ ਹੋਣ ਨਾਲ ਆਏ ਦਿਨ ਕੋਈ ਨਾ ਕੋਈ ਵਾਹਨ ਚਿੱਕੜ ਵਿੱਚ ਫਸ ਜਾਂਦਾ ਹੈ ਅਤੇ ਲੋਕਾਂ ਨੂੰ ਪਰੇਸ਼ਾਨੀ ਦਾ ਸਾਹਮਣਾ ਕਰਨਾ ਪੈਂਦਾ ਹੈ।
ਇਲਾਕੇ ਦੇ ਲੋਕਾਂ ਨੇ ਜ਼ਿਲਾ ਪ੍ਰਸ਼ਾਸਨ ਰੂਪਨਗਰ ਤੋਂ ਮੰਗ ਕੀਤੀ ਹੈ ਕਿ ਇਸ ਪੁਲੀ ਤੋਂ ਆਉਣ ਜਾਣ ਦਾ ਰਸਤਾ ਚੰਗੀ ਤਰ੍ਹਾਂ ਬਣਾਉਣ ਲਈ ਫਿਲਹਾਲ ਆਰਜੀ ਤੌਰ ਤੇ ਇੱਟਾਂ ਦੀ ਰੋੜੀ ਆਦਿ ਪਾਈ ਜਾਵੇ ਤਾਂ ਜੋ ਇੱਥੇ ਵਾਹਨ ਚਾਲਕਾਂ ਨੂੰ ਲੰਘਣ ਲਈ ਆਸਾਨੀ ਹੋਵੇ ਅਤੇ ਕੋਈ ਵੱਡਾ ਹਾਦਸਾ ਹੋਣ ਤੋਂ ਵੀ ਬਚਾਅ ਹੋ ਸਕੇ।
ਇਲਾਕਾ ਨਿਵਾਸੀਆਂ ਵਿੱਚ ਸਾਬਕਾ ਲੈਕਚਰਾਰ ਸ਼ੇਰ ਸਿੰਘ, ਸਾਬਕਾ ਸਰਪੰਚ ਤਰਲੋਚਨ ਸਿੰਘ ਗਿੱਲ, ਸਾਬਕਾ ਚੇਅਰਮੈਨ ਮੇਵਾ ਸਿੰਘ ਗਿੱਲ, ਸੋਸ਼ਲ ਵੈੱਲਫੇਅਰ ਕਲੱਬ ਕੋਟਲਾ ਨਿਹੰਗ ਦੇ ਪ੍ਰਧਾਨ ਅਮਰਜੀਤ ਸਿੰਘ ਲਾਡੀ, ਸਾਬਕਾ ਜਿਲ੍ਹਾ ਪ੍ਰੀਸ਼ਦ ਮੈਂਬਰ ਬਲਵੰਤ ਸਿੰਘ ਗਿੱਲ ਨੇ ਕਿਹਾ ਕਿ ਇਸ ਸਮੱਸਿਆ ਦਾ ਫੌਰੀ ਤੌਰ ‘ਤੇ ਹੱਲ ਕਰਨਾ ਚਾਹੀਦਾ ਹੈ।
