ਪਾਣੀ ਤਾਂ ਸਾਰੇ ਮੰਗਦੇ ਪਰੰਤੂ ਪਾਣੀ ਦੀ ਮਾਰ ਇਕੱਲਾ ਪੰਜਾਬ ਝਲਦਾ – ਚੱਡਾ
ਰੂਪਨਗਰ, 1 ਸਤੰਬਰ ( ਅਵਤਾਰ ਸਿੰਘ ਕੰਬੋਜ )
ਪੰਜਾਬ ਦੇ ਮੌਜੂਦਾ ਹੜ੍ਹਾਂ ਦੇ ਹਾਲਾਤਾਂ ਦੇ ਵਿੱਚ ਰੂਪਨਗਰ ਤੋਂ ਵਿਧਾਇਕ ਐਡਵੋਕੇਟ ਦਿਨੇਸ਼ ਚੱਡਾ ਦੇ ਵੱਲੋਂ ਰੋਪੜ ਹੈਡ ਵਰਕਸ ਤੋਂ ਲੋਕਾਂ ਦੇ ਸਨਮੁਖ ਹੁੰਦੇ ਤੇ ਵੀਡੀਓ ਜਾਰੀ ਕਰਦਿਆਂ ਬਿਆਨ ਦਿੱਤਾ ਗਿਆ ਹੈ ਅਤੇ ਅਤੇ ਆਪਣੇ ਤਰੀਕੇ ਨਾਲ ਰਾਜਨੀਤਿਕ ਪਾਰਟੀਆਂ ਅਤੇ ਆਮ ਲੋਕਾਂ ਨੂੰ ਸਮਝਾਇਆ ਗਿਆ ਹੈ ਕਿ ਰਿਪੇਰੀਅਨ ਸਟੇਟ ਕਿਹੜੀ ਹੁੰਦੀ ਹੈ।
ਉਹਨਾਂ ਕਿਹਾ ਕਿ ਇਸ ਸਮੇਂ ਪੰਜਾਬ ਹੜ੍ਹਾਂ ਦੀ ਮਾਰ ਝੱਲ ਰਿਹਾ ਹੈ ਅਤੇ ਪੰਜਾਬ ਦਾ ਉਜਾੜਾ ਹੋ ਰਿਹਾ ਹੈ, ਜਦੋਂ ਕਿ ਪੰਜਾਬ ਦੇ ਪਾਣੀ ਤੇ ਵੱਖ ਵੱਖ ਸਮੇ ਤੇ ਵੱਖ ਵੱਖ ਰਾਜਨੀਤਿਕ ਪਾਰਟੀਆਂ ਸਿਆਸਤ ਕਰਦੀਆਂ ਹਨ ਅਤੇ ਵੱਖ-ਵੱਖ ਸਮੇਂ ਤੇ ਰਿਪੇਰੀਅਨ ਸਟੇਟ ਦੀਆਂ ਵੱਖ-ਵੱਖ ਪਰਿਭਾਸ਼ਾਵਾਂ ਦਿੱਤੀਆਂ ਜਾਂਦੀਆਂ ਹਨ। ਉਹਨਾਂ ਕਿਹਾ ਕਿ ਰਿਪੇਰੀਅਨ ਸਟੇਟ ਪੰਜਾਬ ਹੈ ਜੋ ਅੱਜ ਕੁਦਰਤੀ ਹੜ੍ਹਾਂ ਦੀ ਕਰੋਪੀ ਦੀ ਮਾਰ ਝੱਲ ਰਿਹਾ ਹੈ।
ਉਹਨਾਂ ਇਸ ਮੌਕੇ ਹਰਿਆਣਾ ਨੂੰ ਵੀ ਨਸੀਹਤ ਦਿੰਦੇ ਹੋਏ ਕਿਹਾ ਕਿ ਹਰਿਆਣਾ ਵਾਧੂ ਪਾਣੀ ਦੀ ਮੰਗ ਤਾਂ ਕਰਦਾ ਹੈ ਪਰੰਤੂ ਪੰਜਾਬ ਦੀ ਹੜ੍ਹਾਂ ਸਮੇਂ ਹੋਣ ਵਾਲੀ ਸਮੱਸਿਆ ਨੂੰ ਸਾਂਝੀ ਕਰਨ ਤੋਂ ਪਾਸਾ ਵੱਟ ਲੈਂਦਾ ਹੈ। ਉਹਨਾਂ ਕਿਹਾ ਕਿ ਹਰਿਆਣਾ ਆਪਣਾ ਵਾਧੂ ਦਾ ਪਾਣੀ ਅਜਿਹੇ ਸਮੇਂ ਤੇ ਸਟੋਰ ਕਿਉਂ ਨਹੀਂ ਕਰ ਲੈਂਦਾ ਜਿਸ ਦੇ ਨਾਲ ਉਸਦੇ ਕੋਲ ਵਾਧੂ ਪਾਣੀ ਸਟੋਰ ਵੀ ਪਿਆ ਰਹੇਗਾ ਤੇ ਪੰਜਾਬ ਨੂੰ ਪੈਣ ਵਾਲੀ ਹੜ੍ਹਾਂ ਦੀ ਮਾਰ ਤੋਂ ਨਿਜਾਤ ਵੀ ਮਿਲ ਸਕਦੀ ਹੈ। ਵਿਧਾਇਕ ਚੱਡਾ ਨੇ ਕਿਹਾ ਕਿ ਪੰਜਾਬ ਇਸ ਸਮੇਂ ਮੁਸ਼ਕਿਲ ਸਮੇਂ ਦੇ ਵਿੱਚੋਂ ਗੁਜ਼ਰ ਰਿਹਾ ਹੈ ਅਤੇ ਪਾਣੀ ਦਾ ਹਿੱਸਾ ਤਾਂ ਸਾਰੇ ਮੰਗਦੇ ਹਨ ਪਰੰਤੂ ਪਾਣੀ ਦੀ ਮਾਰ ਕੇਵਲ ਪੰਜਾਬ ਝੱਲਦਾ ਹੈ।
