ਰੂਪਨਗਰ , 11 ਮਈ ( ਅਵਤਾਰ ਸਿੰਘ ਕੰਬੋਜ਼ )
ਭਾਰਤੀ ਤਕਨਾਲੋਜੀ ਸੰਸਥਾਨ ਰੋਪੜ (ਆਈਆਈਟੀ ਰੋਪੜ) ਨੇ ਅੱਜ ਵੀਯੂਆਈ ਕੰਸਲਟੈਂਸੀ ਪ੍ਰਾਈਵੇਟ ਲਿਮਿਟਿਡ ਨਾਲ ਇੱਕ ਸਮਝੌਤਾ ਪੱਤਰ (ਐਮਓਯੂ) ‘ਤੇ ਦਸਤਖਤ ਕੀਤੇ। ਇਸ ਸਮਝੌਤੇ ਦਾ ਉਦੇਸ਼ ਨਕਲੀ ਬੁੱਧੀਮੱਤਾ-ਆਧਾਰਿਤ ਸਾਈਬਰ ਰੱਖਿਆ, ਡਿਜੀਟਲ ਭਰੋਸੇਯੋਗਤਾ ਅਤੇ ਅਤੇ ਉੱਭਰਦੀਆਂ ਸੁਰੱਖਿਆ ਤਕਨਾਲੋਜੀਆਂ ਦੇ ਖੇਤਰ ਵਿੱਚ ਰਣਨੀਤਕ ਸਹਿਯੋਗ ਨੂੰ ਹੁਲਾਰਾ ਦੇਣਾ ਹੈ।
ਇਸ ਸਮਝੌਤਾ ਪੱਤਰ ‘ਤੇ ਆਈਆਈਟੀ ਰੋਪੜ ਦੇ ਡਾਇਰੈਕਟਰ ਪ੍ਰੋ. ਰਾਜੀਵ ਅਹੂਜਾ ਅਤੇ ਵੀਯੂਆਈ ਕੰਸਲਟੈਂਸੀ ਪ੍ਰਾਈਵੇਟ ਲਿਮਿਟਿਡ ਦੇ ਡਾਇਰੈਕਟਰ ਸ੍ਰੀ ਅੰਸ਼ੁਲ ਗੋਇਲ ਨੇ ਦਸਤਖਤ ਕੀਤੇ। ਇਸ ਮੌਕੇ ਰਾਸ਼ਟਰੀ ਜਾਂਚ ਏਜੰਸੀ (ਐਨਆਈਏ) ਦੇ ਸਾਬਕਾ ਡਾਇਰੈਕਟਰ ਜਨਰਲ ਅਤੇ ਆਈਆਈਟੀ ਰੋਪੜ ਦੇ ਪ੍ਰੋਫੈਸਰ ਆਫ ਪ੍ਰੈਕਟਿਸ ਸ੍ਰੀ ਦਿਨਕਰ ਗੁਪਤਾ, ਬਾਇਓਮੈਡੀਕਲ ਇੰਜੀਨੀਅਰਿੰਗ ਵਿਭਾਗ ਦੇ ਮੁਖੀ ਡਾ. ਅਥਰਵ ਪੌਂਡਰਿਕ ਅਤੇ ਸੰਸਥਾਨ ਦੇ ਹੋਰ ਫੈਕਲਟੀ ਮੈਂਬਰ ਵੀ ਹਾਜ਼ਰ ਰਹੇ।
ਵੀਯੂਆਈ ਕੰਸਲਟੈਂਸੀ ਪ੍ਰਾਈਵੇਟ ਲਿਮਿਟਿਡ ਇੱਕ ਭਾਰਤੀ ਤਕਨਾਲੋਜੀ ਅਤੇ ਸਾਈਬਰ ਸੁਰੱਖਿਆ ਕੰਪਨੀ ਹੈ, ਜੋ ਏਕੀਕ੍ਰਿਤ ਸਾਈਬਰ ਸੁਰੱਖਿਆ, ਖੁਫੀਆ ਜਾਣਕਾਰੀ, ਏਆਈ ਅਤੇ ਡਿਜੀਟਲ ਪਲੇਟਫਾਰਮ ਹੱਲਾਂ ਵਿੱਚ ਮੁਹਾਰਤ ਰੱਖਦੀ ਹੈ। ਇਹ ਕੰਪਨੀ ਭਾਰਤ ਅਤੇ ਯੂਏਈ ਵਿੱਚ ਸਰਕਾਰੀ ਸੰਗਠਨਾਂ, ਜਨਤਕ ਅਦਾਰਿਆਂ ਅਤੇ ਨਿਯਮਿਤ ਉੱਦਮਾਂ ਲਈ ਸੰਪ੍ਰਭੂ ਡਿਜੀਟਲ ਪਲੇਟਫਾਰਮ, ਸਾਈਬਰ ਰੱਖਿਆ ਪ੍ਰਣਾਲੀਆਂ, ਏਆਈ-ਸੰਚਾਲਿਤ ਵਿਸ਼ਲੇਸ਼ਣ ਅਤੇ ਅਨੁਕੂਲਿਤ ਤਕਨਾਲੋਜੀ ਹੱਲ ਪ੍ਰਦਾਨ ਕਰਦੀ ਹੈ।
ਇਹ ਭਾਈਵਾਲੀ ਰਾਸ਼ਟਰੀ ਸੁਰੱਖਿਆ ਲੋੜਾਂ ਦੇ ਅਨੁਕੂਲ ਸਵਦੇਸ਼ੀ ਏਆਈ-ਆਧਾਰਿਤ ਸਾਈਬਰ ਸੁਰੱਖਿਆ ਉਤਪਾਦਾਂ ਅਤੇ ਪਲੇਟਫਾਰਮਾਂ ਦੇ ਵਿਕਾਸ ‘ਤੇ ਕੇਂਦਰਿਤ ਹੈ। ਸਹਿਯੋਗ ਦੇ ਮੁੱਖ ਖੇਤਰਾਂ ਵਿੱਚ ਸਾਈਬਰ ਸੁਰੱਖਿਆ ਲਈ ਏਆਈ, ਸਾਈਬਰ ਰੱਖਿਆ ਪਲੇਟਫਾਰਮ, ਨਾਜ਼ੁਕ ਬੁਨਿਆਦੀ ਢਾਂਚੇ ਦੀ ਸੁਰੱਖਿਆ, ਡਿਜੀਟਲ ਫੋਰੈਂਸਿਕਸ ਅਤੇ ਗੋਪਨੀਯਤਾ ਤੇ ਪਾਲਣਾ ਢਾਂਚੇ ਸ਼ਾਮਲ ਹਨ। ਦੋਵੇਂ ਸੰਸਥਾਨ ਇੰਟਰਨਸ਼ਿਪ, ਪ੍ਰਮਾਣੀਕਰਨ, ਸਾਂਝੀ ਖੋਜ ਅਤੇ ਉੱਤਮਤਾ ਕੇਂਦਰਾਂ ਰਾਹੀਂ ਕੁਸ਼ਲ ਮਨੁੱਖੀ ਸੰਸਾਧਨ ਤਿਆਰ ਕਰਨ ਵਿੱਚ ਵੀ ਮਿਲ ਕੇ ਕੰਮ ਕਰਨਗੇ।
ਇਸ ਮੌਕੇ ਪ੍ਰੋ. ਰਾਜੀਵ ਅਹੂਜਾ ਨੇ ਕਿਹਾ ਕਿ ਇਹ ਸਹਿਯੋਗ ਭਾਰਤ ਦੇ ਡਿਜੀਟਲ ਸੁਰੱਖਿਆ ਖੇਤਰ ਲਈ ਅਕਾਦਮਿਕ ਖੋਜ ਨੂੰ ਵਿਹਾਰਕ ਹੌਲਾਂ ਵਿੱਚ ਬਦਲਣ ਦੀ ਆਈਆਈਟੀ ਰੋਪੜ ਦੀ ਵਚਨਬੱਧਤਾ ਨੂੰ ਦਰਸਾਉਂਦਾ ਹੈ। ਇਸ ਸਮਝੌਤਾ ਪੱਤਰ ਅਧੀਨ ਵਿਦਿਆਰਥੀ ਇੰਟਰਨਸ਼ਿਪ, ਖੋਜ ਪ੍ਰਬੰਧ, ਫੈਕਲਟੀ ਆਦਾਨ-ਪ੍ਰਦਾਨ ਅਤੇ ਖੋਜ ਨਤੀਜਿਆਂ ਦੇ ਸਾਂਝੇ ਵਪਾਰੀਕਰਨ ਦਾ ਵੀ ਪ੍ਰਬੰਧ ਕੀਤਾ ਗਿਆ ਹੈ।
