ਰੂਪਨਗਰ ( ਅਵਤਾਰ ਸਿੰਘ ਕੰਬੋਜ਼ )
ਗੁਰੂ ਗੋਬਿੰਦ ਸਿੰਘ ਸਟੱਡੀ ਸਰਕਲ ਦੇ ਸਰਪ੍ਰਸਤ ਪ੍ਰਿੰਸੀਪਲ ਰਾਮ ਸਿੰਘ ਜੀ ਕੁਲਾਰ ਦਾ ਅੰਗੀਠਾ ਅੱਜ ਗੁਰਦੁਆਰਾ ਪਤਾਲਪੁਰੀ ਸਾਹਿਬ, ਕੀਰਤਪੁਰ ਸਾਹਿਬ ਵਿਖੇ ਉਨ੍ਹਾਂ ਦੇ ਪਰਿਵਾਰਕ ਮੈਂਬਰਾਂ ਅਤੇ ਸਟੱਡੀ ਸਰਕਲ ਦੇ ਅਹੁਦੇਦਾਰਾਂ ਵਲੋਂ ਪੂਰਨ ਗੁਰਮਰਿਆਦਾ ਅਨੁਸਾਰ ਅਰਦਾਸ ਕਰਕੇ ਜਲ ਪ੍ਰਵਾਹ ਕੀਤਾ ਗਿਆ।
ਸਟੱਡੀ ਸਰਕਲ ਦੇ ਡਾਇਰੈਕਟਰ ਓਵਰਸੀਜ਼ ਇੰਦਰਪਾਲ ਸਿੰਘ ਚੱਡਾ ਨੇ ਦੱਸਿਆ ਕਿ ਪ੍ਰਿੰਸੀਪਲ ਰਾਮ ਸਿੰਘ ਨੇ 26 ਸਾਲ (1986-2012) ਤੱਕ ਗੁਰੂ ਗੋਬਿੰਦ ਸਿੰਘ ਸਟੱਡੀ ਸਰਕਲ ਦੇ ਚੀਫ਼ ਆਰਗੇਨਾਈਜਰ ਵਜੋਂ ਅਗਵਾਈ ਕੀਤੀ। ਗੁਰੂ ਹਰਿ ਗੋਬਿੰਦ ਖਾਲਸਾ ਕਾਲਜ ਗੁਰੂਸਰ ਸੁਧਾਰ ਵਿਖੇ ਅੰਗਰੇਜ਼ੀ ਦੇ ਪ੍ਰੋਫੈਸਰ ਵਜੋਂ ਸੇਵਾਵਾਂ ਸ਼ੁਰੂ ਕਰਕੇ ਉਹ ਲੰਮਾ ਸਮਾਂ ਅਕਾਲ ਕਾਲਜ ਮਸਤੂਆਣਾ ਦੇ ਪ੍ਰਿੰਸੀਪਲ ਰਹੇ। ਕਲਗੀਧਰ ਟਰੱਸਟ ਬੜੂ ਸਾਹਿਬ ਵਲੋਂ ਚਲਾਈਆਂ ਜਾ ਰਹੀਆਂ ਅਕਾਲ ਅਕੈਡਮੀਆਂ ਦੇ ਡਾਇਰੈਕਟਰ ਵਜੋਂ ਕਾਰਜਸ਼ੀਲ ਰਹੇ।
ਉਨ੍ਹਾਂ ਨੇ ਸ਼੍ਰੀ ਅਕਾਲ ਤਖਤ ਸਾਹਿਬ ਦੀ ਪੰਜ ਮੈਂਬਰੀ ਸਲਾਹਕਾਰ ਕੌਂਸਲ ਅਤੇ ਧਰਮ ਪ੍ਰਚਾਰ ਕਮੇਟੀ, ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਦੇ ਮੈਂਬਰ ਵਜੋਂ ਲੰਮਾ ਸਮਾਂ ਸੇਵਾਵਾਂ ਨਿਭਾਈਆਂ। ਸ਼੍ਰੀ ਅਕਾਲ ਤਖ਼ਤ ਸਾਹਿਬ ਵਲੋਂ ਉਨ੍ਹਾਂ ਨੂੰ “ਪ੍ਰੋਫੈਸਰ ਆਫ ਸਿਖਿਜ਼ਮ” ਵਜੋਂ ਸਨਮਾਨਿਤ ਕੀਤਾ ਗਿਆ। 19 ਜਨਵਰੀ 2025 ਨੂੰ ਉਹ ਬਰੈਂਪਟਨ ਕੈਨੇਡਾ ਵਿਖੇ ਅਕਾਲ ਚਲਾਣਾ ਕਰ ਗਏ ਸਨ, ਜਿੱਥੇ ਉਨ੍ਹਾਂ ਦੀਆਂ ਅੰਤਿਮ ਰਸਮਾਂ ਪੂਰਨ ਗੁਰ ਮਰਿਆਦਾ ਅਨੁਸਾਰ ਨਿਭਾਈਆਂ ਗਈਆਂ।
ਇਸ ਮੌਕੇ ਤੇ ਸਟੱਡੀ ਸਰਕਲ ਦੇ ਸਾਬਕਾ ਚੇਅਰਮੈਨ ਸ.ਪ੍ਰਤਾਪ ਸਿੰਘ, ਡਾਇਰੈਕਟਰ ਓਵਰਸੀਜ਼ ਸ.ਇੰਦਰਪਾਲ ਸਿੰਘ, ਸ. ਕਰਨਪ੍ਰੀਤ ਸਿੰਘ ਬੋਪਾਰਾਏ ਸਮੇਤ ਉਨ੍ਹਾਂ ਦੀ ਧਰਮ ਪਤਨੀ ਸਰਦਾਰਨੀ ਪਰਮਿੰਦਰ ਕੌਰ ਕੁਲਾਰ, ਰੀਟਾਇਰਡ ਹੈੱਡ ਮਿਸਟਰੈਸ ਤੇ ਸਟੇਟ ਅਵਾਰਡੀ, ਸਪੁੱਤਰ ਸ.ਮੋਹਿੰਦਰ ਸਿੰਘ ਕੁਲਾਰ,ਨੂੰਹ ਅਮਨਲੀਨ ਕੌਰ ਕੁਲਾਰ,ਬੇਟੀ ਪ੍ਰਭਜੋਤ ਕੌਰ ਸਿਬੀਆ,ਪੋਤਰੀਆਂ ਵਿਨੀਤ ਕੌਰ ਕੁਲਾਰ ਤੇ ਜਿੰਦ ਕੌਰ ਕੁਲਾਰ,ਪੋਤਰਾ ਜਗਤ ਸਿੰਘ ਕੁਲਾਰ, ਅਤੇ ਸੰਬੰਧੀ ਸ.ਦਲਵਿੰਦਰ ਸਿੰਘ ਗਿੱਲ,ਰਵਿੰਦਰ ਕੌਰ ਗਿੱਲ,ਅਰਮਾਨ ਸਿੰਘ ਗਿੱਲ,ਗੁਰਦੀਪ ਕੌਰ ਬੋਪਰਾਏ,ਗੁਰਦੁਆਰਾ ਸਾਹਿਬ ਦਾ ਸਟਾਫ ਬਾਬਾ ਰਵਿੰਦਰ ਸਿੰਘ, ਸ.ਗੁਰਦੀਪ ਸਿੰਘ, ਸ.ਫਤਿਹ ਸਿੰਘ ਹਾਜ਼ਰ ਸਨ। ਗੁਰੂ ਘਰ ਵੱਲੋਂ ਪ੍ਰੀਵਾਰ ਨੂੰ ਸਿਰੋਪਾਓ ਦੀ ਬਖਸ਼ਿਸ਼ ਕੀਤੀ ਗਈ।
