ਸਕੂਲ ਦੇ ਚੇਅਰਮੈਨ ਜੇ ਕੇ ਜੱਗੀ ਨੇ ਕੌਮੀ ਝੰਡਾ ਲਹਿਰਾਇਆ
ਰੂਪਨਗਰ, 16 ਅਗਸਤ ( ਪਰਵਿੰਦਰ ਕੌਰ )
ਸਤਲੁਜ ਪਬਲਿਕ ਸਕੂਲ ਹੁਸੈਨਪੁਰ ਰੂਪਨਗਰ ਵਿਖੇ ਦੇਸ਼ ਦਾ 79ਵਾਂ ਆਜ਼ਾਦੀ ਦਿਹਾੜਾ ਬੜੀ ਧੂਮਧਾਮ ਨਾਲ ਮਨਾਇਆ ਗਿਆ। ਸਕੂਲ ਦੇ ਚੇਅਰਮੈਨ ਸ੍ਰੀ ਜੇ .ਕੇ .ਜੱਗੀ ਜੀ ਨੇ ਕੌਮੀ ਝੰਡਾ ਲਹਿਰਾਇਆ। ਸਮੂਹ ਅਧਿਆਪਕਾਂ ਨੇ ਦੇਸ਼ ਦੇ ਸ਼ਹੀਦਾਂ ਨੂੰ ਸ਼ਰਧਾ ਦੇ ਫੁੱਲ ਭੇਟ ਕੀਤੇ। ਸ੍ਰੀ ਜੱਗੀ ਜੀ, ਸੀ.ਈ.ਓ. ਸ੍ਰੀ ਮਨਮੋਹਨ ਕਾਲੀਆ ਤੇ ਪ੍ਰਿੰਸੀਪਲ ਕਮਲਜੀਤ ਕੌਰ ਨੇ ਵਿਦਿਆਰਥੀਆਂ, ਅਧਿਆਪਕਾਂ ਤੇ ਦੇਸ਼ ਵਾਸੀਆਂ ਨੂੰ ਆਜ਼ਾਦੀ ਦਿਵਸ ਦੀਆਂ ਲੱਖ- ਲੱਖ ਵਧਾਈਆਂ ਦਿੱਤੀਆਂ। ਆਪਣੇ ਸੰਬੋਧਨੀ ਸ਼ਬਦਾਂ ਵਿੱਚ ਸ੍ਰੀ ਜੱਗੀ ਕਿਹਾ ਕਿ ਸਾਨੂੰ ਸਾਰਿਆਂ ਨੂੰ ਦੇਸ਼ ਦੀ ਤਰੱਕੀ ਵਿੱਚ ਆਪਣਾ ਬਣਦਾ ਯੋਗਦਾਨ ਪਾਉਣਾ ਚਾਹੀਦਾ ਹੈ, ਇਹੋ ਸਾਡੀ ਸੱਚੀ ਦੇਸ਼- ਭਗਤੀ ਦੀ ਮਿਸਾਲ ਹੋਵੇਗੀ। ਰਾਸ਼ਟਰੀ ਗੀਤ ਦਾ ਗਾਇਨ ਕੀਤਾ ਗਿਆ। ਸਕੂਲ ਅਧਿਆਪਕਾਂ ਵੱਲੋਂ ਦੇਸ਼-ਪ੍ਰੇਮ ਦੇ ਗੀਤ ਗਾਏ ਗਏ। ਪ੍ਰੋਗਰਾਮ ਦੇ ਅੰਤ ਵਿੱਚ ਸਮੂਹ ਸਟਾਫ ਨੂੰ ਮਿਠਿਆਈਆਂ ਵੰਡੀਆਂ ਗਈਆਂ।
ਸੀਨੀਅਰ ਦਿੱਲੀ ਪਬਲਿਕ ਸਕੂਲ ਵਿਖੇ ਵੀ ਸਮਾਗਮ
ਰੂਪਨਗਰ ਦਸ਼ਮੇਸ਼ ਨਗਰ ਸਥਿਤ ਸੀਨੀਅਰ ਦਿੱਲੀ ਪਬਲਿਕ ਸਕੂਲ ਵਿਖੇ ਵੀ 79ਵਾਂ ਸੁਤੰਤਰਤਾ ਦਿਵਸ ਧੂਮ ਧਾਮ ਨਾਲ ਮਨਾਇਆ ਗਿਆ। ਸਕੂਲ ਦੇ ਚੇਅਰਮੈਨ ਸ੍ਰੀ ਜੇ. ਕੇ. ਜੱਗੀ, ਸੀ.ਈ.ਓ ਮਨਮੋਹਨ ਕਾਲੀਆ ਜੀ, ਪ੍ਰਿੰਸੀਪਲ ਮੈਡਮ ਪਵਨੀਤ ਕੌਰ, ਵਾਈਸ ਪ੍ਰਿੰਸੀਪਲ ਮੈਡਮ ਗੀਤਾ ਖੇਰਾ ਵੱਲੋਂ ਤਿਰੰਗਾ ਲਹਿਰਾ ਕੇ ਰਾਸ਼ਟਰੀ ਗਾਣ ਉਪਰੰਤ ਤਿਰੰਗੇ ਨੂੰ ਸਲਾਮੀ ਦਿੱਤੀ ਗਈ। ਸਕੂਲ ਦੇ ਚੇਅਰਮੈਨ ਸ੍ਰੀ ਜੇ਼. ਕੇ ਜੱਗੀ ਨੇ ਸਭਨਾਂ ਨੂੰ ਸੁਤੰਤਰਤਾ ਦਿਵਸ ਦੀਆਂ ਵਧਾਈਆਂ ਦਿੱਤੀਆਂ ਤੇ ਬੱਚਿਆਂ ਵਿੱਚ ਪਿਆਰ ,ਸਨੇਹ, ਤਿਆਗ, ਬਲੀਦਾਨ ਦਾ ਖੂਬ ਜਜ਼ਬਾ ਭਰਿਆ। ਉਹਨਾਂ ਸਰਦਾਰ ਭਗਤ ਸਿੰਘ, ਕਰਤਾਰ ਸਿੰਘ ਸਰਾਭਾ, ਊਧਮ ਸਿੰਘ ,ਰਾਣੀ ਲਕਸ਼ਮੀ ਬਾਈ, ਰਾਸ਼ਟਰੀ ਚਿੰਨ ,ਭਾਰਤ ਮਾਤਾ ,ਸਿਪਾਹੀ ,ਫੌਜੀ ਆਦਿ ਬਣ ਕੇ ਆਏ ਬੱਚਿਆਂ ਦੀ ਖੂਬ ਹੌਸਲਾ ਅਫਜਾਈ ਕੀਤੀ। ਬੱਚਿਆਂ ਨੇ ਦੇਸ਼ ਭਗਤੀ ਦੇ ਗੀਤ ਤੇ ਕਵਿਤਾਵਾਂ ਗਾ ਕੇ ਖੂਬ ਰੰਗ ਬੰਨਿਆ। ਬੱਚਿਆਂ ਵੱਲੋਂ ਰੰਗਾਰੰਗ ਪ੍ਰੋਗਰਾਮ ਪੇਸ਼ ਕਰਨ ਦੇ ਨਾਲ ਹੀ ਪਰੇਡ ਤੇ ਕਰਾਟੇ ਗਤੀਵਿਧੀਆਂ ਦਾ ਪ੍ਰਦਰਸ਼ਨ ਵੀ ਬੜੇ ਸੁਚੱਜੇ ਢੰਗ ਨਾਲ ਕੀਤਾ ਗਿਆ। ਸਾਰਾ ਸਕੂਲ ਹੀ ਤਿੰਨ ਰੰਗਾਂ ਦੀ ਸਜਾਵਟ ਨਾਲ ਰੰਗਿਆ ਗਿਆ ਸੀ। ਸੀਨੀਅਰ ਕੇ .ਜੀ ਦੇ ਬੱਚਿਆਂ ਵੱਲੋਂ ਸਾਰੇ ਹੀ ਰਾਸ਼ਟਰੀ ਚਿੰਨਾ ਦੇ ਸੰਬੰਧ ਵਿੱਚ ਕਵਿਜ਼ ਕਰਵਾਇਆ ਗਿਆ। ਸੀਨੀਅਰ ਵਿੰਗ ਦੇ ਬੱਚਿਆਂ ਵੱਲੋਂ ਦੇਸ਼ ਭਗਤੀ ਨੂੰ ਸਮਰਪਿਤ ਫੈਂਸੀ ਡਰੈਸ ਮੁਕਾਬਲੇ ਕਰਵਾਏ ਗਏ ਜਿਨਾਂ ਵਿੱਚ ਪਹਿਲੀ ਜਮਾਤ ਵਿੱਚੋਂ ਵਾਸੂ ਪਹਿਲੇ, ਰਿਸ਼ੀਕ ਦੂਜੇ ਅਤੇ ਪਰਿਸ਼ਾ ਦੂਬੇ, ਗੁਨ ਜੋਰਾਵਰ ਸਿੰਘ ਤੀਜੇ ਦਰਜੇ ਤੇ ਰਹੇ। ਦੂਜੀ ਜਮਾਤ ਵਿੱਚੋਂ ਸ਼ਿਵਾਸ ਸੈਣੀ ਅਤੇ ਅਰਸ਼ਪ੍ਰੀਤ ਕੌਰ ਪਹਿਲੇ, ਖੁਸ਼ੀ ਤੇ ਰੂਹੀਕਾ ਰਤਨ ਦੂਜੇ ਅਤੇ ਗੁਰਤਾਜ ਸਿੰਘ ਤੀਜੇ ਦਰਜੇ ਤੇ ਰਹੇ। ਤੀਸਰੀ ਜਮਾਤ ਵਿੱਚੋਂ ਸਿਧੇਸ਼ ਪਾਟਿਲ ਪਹਿਲੇ ਅਤੇ ਪਰੀਨੂਰ ਕੌਰ ਦੂਜੇ ਦਰਜ ਤੇ ਰਹੇ। ਚੌਥੀ ਜਮਾਤ ਵਿੱਚੋਂ ਅਨੀਕਾ ਨੇ ਪਹਿਲਾ, ਅਰਸ਼ੀਆ ਗੋਸਵਾਮੀ ਨੇ ਦੂਜਾ ਅਤੇ ਸਮਾਇਰਾ ਜੈਨ ਨੇ ਤੀਜਾ ਸਥਾਨ ਹਾਸਲ ਕੀਤਾ। ਇਸੇ ਤਰ੍ਹਾਂ ਪੰਜਵੀਂ ਜਮਾਤ ਵਿੱਚੋਂ ਅਰਸ਼ਪ੍ਰੀਤ ਕੌਰ ਨੇ ਪਹਿਲਾ, ਸਮਰ ਠਾਕੁਰ ਨੇ ਦੂਜਾ ਅਤੇ ਪ੍ਰਤੀਕ ਸਿੰਘ ਨੇ ਤੀਸਰਾ ਸਥਾਨ ਹਾਸਿਲ ਕੀਤਾ।
